CHHUNGKAW INPAWHTAWN TAK LEH THIANTHA
Mi tupawh sum leh pai avanga a hun pum a hman ral chuan a chhungte nen an inpawhtawn tak tak thei lova, inhriatthiamna tha tak neih pawh a har thlawt a ni. Sum leh paiin a lei theih loh zingah chuan i nu emaw i nupuiin emaw i pasal pawh nise i duh zawng tak chawhmeh a siamsak thin che kha sum leh paiin a lei theih loh zingah hian a tel a nia aw. Thian tha hi sum leh paia lei ngawt theih a ni lo. I chet theih lai chuan thian tha i ngah viau pawh a ni thei e. I tlak chhiat leh mangan nikhuaah a dikzia i hrechhuak fovin ka ring. Chutih hunah chuan i harsatna leh buaina chu nangmah bawkin i chinfel a ngai leh thin ang.
HLIMNA RUN NUAM
Chhungkua i din a, fanau maltluan chawiin hun i hmang nasa viau pawh a ni thei e. I fate taksa leh rilru lamah an hrilsel tha tawk em? Nu ber emaw pa ber emaw i ni ta a, chu i nihna chu i luah zo tha tawk maw? In chhungkaw chenna rûn in sang kha hlimna rûn nuam a ni em? Nge, hlimna tel lovin chhungkua inchengzaho mai zawk? Dik tak chuan, In (rûn In) kan tih hi a chhunga chengte hlim tlang taka kan chenho hian chu In chuan hlutna a nei ve chauh zawk a sin. Chu ngei chu sum leh paia lei zawh rual a ni si lo.
RILRU HAHDAMNA
Mihring hian taksa hahdamna kan duh a. Kan thlahlel a, kan zawng a. A ni, hei ai mah hian rilru hahdamna kan mamawh zawk a ni lo vem ni? mahse, chu rilru hahdamna chu i hmu em? Sumin i lei thei ang em?
REMNA LEH MUANNA
Khawvel hian remna leh muanna a zawng a. Chu, a thil zawn chu a hmu meuh em le. Dik tak chuan, remna leh muanna hi sum leh paia lei theih chu ni ngat se, khawvel mi hausa (Billionaire) ten an lei fai deuh vek tawh ang. mahse, lei theih a nih miau loh avangin khawvel ram hrang hrang insuihkhawm pawl (UNO) meuh pawhin a hun pum a hman ral mek tâk hi.
HLAWHTLINNA KUMHLUN
Khawvel chanchinbu lar Forbes magazine-in milar leh mi hlawhtlingte kum tin a tar lang thin. Forbes magazine-in a tarlan zingah hian kum 30 a zâwna tel thei i nih chuan khawvel mi vannei bera chhiar theih i ni ngei ang. Chuti anga hlawhtling leh vannei reng tur chuan sum leh paiin a lei thei mawlh si lo.
ZAHAWMNA
Zahawmna awmna chu keimahniah a ni a. Chu zahawmna chu hlawhchhuah ngai a ni. Suma lei ngai a ni lova, lei theih a ni bawk hek lo. he zahawmna hi mitin neih theih a nih rualin, mitin tana thil neih harsa tak a ni thung.
PIANPUI THIAMNA
Mihringah zir thiamna vang ni lovin pianpui thiamna (Mizovin pianpui BA kan ti mai thin) hi zawrh chhuah theih a ni lo. Sum leh paia lei chi lah a ni bawk lo. Sum hai luh nan a hman theih a. mi bik chanvo a ni.
DAM LEH HRISELNA
Hrisel lo takte hian hriselna hlutzia an hre chiang khawp ang. harsa deuh tan phei chuan neih thing lung khawngin kan inenkawl thin a nih hi. Chuti khawpa pawimawh hriselna chu keini hian kan ngai pawimawh tawk em le? Chu hriselna chu lei zawh rual a nih loh avangin hrisel tura mahni lam fimkhur leh invenlawk hi a hlawk ber ang. Chuvang a ni ang, Isaak Walton-an, “I hriselna kha en teh, hriselna i neih chuan Pathian fak la, chhia leh tha hriatna tha dawttu tluka hlu-ah ngai rawh; hriselna hi thi thei te’n malsawmna kan dawn theih pahnihna a ni si a, chu malsawmna chu suma lei theih chi a ni si lo” tia a lo sawi ni.
HMANGAIHNA
Mihringin Pathian mizia a lak zinga hlu ber mai chu hmangaihna hi a ni hial awm e. mahse, chu hmangaihna chu tunlai thalaite hian zawrh sum ang lekah kan chantir ta pawh a ni thei e. Dik tak chuan, chuti anga lo chantirtu chuan a dikna leh chanvo a hloh tel tih an inhre hauh si lo. hmangaihna hi sum leh paiin a lei zo mawlh lo tih hi i hre nawn fo ang u. Jay Chase chuan, “hmangaihna te, hriselna te, hlimna te hi pawisaa lei theih a ni lo, nikuma a lei theih pawh a lei thei hek lo.”
NUNGCHANG MAWI
Sap-in character an tih, mizo in NuNgChANg mAWI kan tih hi mihring nun tizahawmtu a ni. Zir sang leh mi hmingthangte paw’n he nungchang mawi hi an zirna atangin an nei ngawt thei bik lova. Dinhmun sâng takah dingin he nungchang hi hloh ta tlat ila, chu ngei chu hero atanga Zero-a min hnuk thlatu tur chu a ni. Chu nungchang mawi tak chu suma lei ngawt a theih lova, mahni inthununna leh inenfiah fo atangin kan nei mai zawk thin.