Aizawl: Aizawl Municipal Corporation (AMC) Municipal Commissioner chuan thupek tichhuakin, Legislative Assembly House chhehvela dan kalha thil zuarte chu pawisa chawitir bakah an thil zawrhte mansak theih an nih tur thu a hriattir.
Nilainia hriattirna a tihchhuah danin, Mizoram Legislative Assembly leh a chhehvel – Venghlui Local Council leh Tuikual South Local Council huam chhung hi Section 208 of Mizoram Municipalities Act, 2007-in thuneihna a pek angin, kawngkama inzawrh phal lohna hmuna puan a lo ni tawh a. Helai hmuna thil zuar thin zawng zawng te tan AMC Multi-Complex Tuikual South-ah thutna hmun siam sak a ni a. Chuvangin, thil zawrh phal lohna hmunah hian tumah thu lui tawh lo turin a hriattir nawn leh a ni.
He thupek zawm loa chetlate chungah khauh takin Mizoram Municipalities Act, 2007 lek kawh a nih tur thu leh Rs. 5,000 chawitir theih an nih bakah, an thilzawrh man sak theih an nih thu a tar lang bawk.