Aizawl: Lunglei khaw chhunga vawiina total bandh neih an tum chu MZP Hqrs., Lunglei chuan an thulh.
Ningani chhun khan MZP Hqrs., Lunglei chuan thutkhawm hmanhmawh koin, Aizawl-Thenzawl-Lunglei (ATL) road siamna tura sum pawhpen duh loh lan tirna chungchang an kal zel dan tur an ngaihtuah a. Sorkar atanga an thil phul, ATL road siamna tur sum pawh pen dah let tura an ngiat, Rs vbc 44.89 aia tam, Rs vbc 58.99 an dahna order bakah Central Road Research Institute (CRRI) mi thiamten zirchiang tura ruahmanna an chhawochhuah leh, tuna sorkarin an sum dah baka a daih loh chin zawng pawh dah zel a nih tur thu an dawn avangin, vawiina total bandh neih tura ruahmanna an lo siam tawh chu thulh an rel.
Hetih rual hian, sorkar chu a intiamnaah a ding nghet em tih enfiahin, chhim mipuite tana kawng tangkai tak ATL road hi an siam tirh atanga a tawp thlengin an vil zui zel an tum a ni.
Thutkhawm kaihruaitu, MZP Hqrs. Lunglei President Johan Hmangaihzuala chuan, hmalakna an neih chhung zawnga theihtawp chhuaha thlawp tlat tute leh thilpek pe tute chungah lawmthu a sawi a. An hmalakna neih chhunga mipui leh khualzinte harsatna an thlen avangin hriatthiamna a ngen nghal bawk.