Thawkkhat lai khan social media in nasa takin min luhchhuah thut a, kan inrin hman hmain changkanna nasa tak kan tawng thut a, hei hian nasa takin min nghawng zui bawk.
Min nghawng dan hi a tha lam leh a tha lo lam tam tak a awm thei ang. Chutiang taka changkanna kan tawn thut avang chuan kan tawn leh hriat thin tam tak kan kalsan a, lehkhabu chhiar thlengin kan kalsan hman!
Hun a inher leh hret a, kan mithiam leh vantlang hriata milar kan neih thenkhatten lehkhabu kan chhiar tlem ta lutuk chu veiin, an auchhuahpui chho ta a, tunah erawh hei hian rahtha a chhuah chho zel ta.
Tun hnai lawkah pawh HSLC result a chhuak a, Mizoram pum huapa a titha pawl thenkhat chuan an zirlai bakah lehkhabu an chhiar thu an sawi. Mizoram puma pakhatna phei kha chuan lehkhabu a chhiar tui chang chuan a zirlai zirna hun chu a hma aia rei hreta hun a siam mai zel thu a sawi hial.
Lehkhabu chhiar tam hi a tha a, Mizo tawnga lehkhabu chhuak zingah pawh tha tak tak kan nei bawk. Kan hnam lehkhathiam hmasa leh mi hmasate khan lehkhabu an chhiar a, an ziak bawk a; vawiina kan hnam tan hian a hlu asin.
Zirlaite hian lehkhabu chhiar tam lehzual ila, zirlaite pawhin kan zirna bakah lehkhabu tha dang chhiar i uar deuh deuh zel ang u. Kan mi ngaihsante pawh hian an lo chhiar nasa thin ania.