“A châng chuan mal ngawih ngawiha inhriatna te, tu nge ka pan ang, tia inngaihtuah buaina te, tu bulah nge ka sawichhuah ang, tih te chu hringnunah hian vawi tam a lo thleng thin. I thil ngaihtuah leh i hun tawn mek kha a khirh em vanga midang bula sawi chhuah ngam loha inhriatna leh thim chhah takin a bawm mek che nia inhmuhna te a lo awm thin bawk ang.
“Heti ang hunah hian puitu leh kaihruaitu i mawh mawh ngawih ngawih. Mamawh leh puitu i ngai tih inhriatna hi thil tha a ni a, tanpuina dil hi tlawmna a ni reng reng lo,” tiin Demi Lovato hian a sawi.
“Hei hi chakna lantirna a ni zawk. Society hian midang puihna dil hi tlawmna angah min hmuhtir fo a, mahse tanpuina dil hi talchhuahna kawnga ke pen pawimawh hmasa ber a ni a, engti anga harsa pawh ni se, tanpuina dil hi talchhuahna hmahruaitu a ni hrim hrim,” a ti bawk.
Rimawi khawvelah naupangte ni chungin hming a chher a, hla hit tak tak thlawhin, chawimawina nasa takin a zui a, hlim leh lawm taka hun a hmang nia a inngaih laiin, rilru lam harsatna namen lo a nei reng tih a inhmuchhuak.
Hemi hnu hian a hun tam zawk hi rilru lama harsatna chi hrang hrang chinfelna a ni zui a, tunah ngai awh chho leh turin thapui a thawh mek. Rilru lam hriselna ngaihthah a pawi theihzia a hrechiang.
“Hunbi neiin exer ka la reng a, ka walk thin. Rilru sawrbing (meditating) hian nasa takin min pui. Rilru ngil tak i put theihna tur thil engpawh i tan a tha,” tiin midangte chu thurawn a pe.