Aizawl: MPCC President Lal Thanzara’n ZPM sorkar chu an intiam ang tihlawhtling lo leh hlawmchhamah puhin; politics chu lal duh avanga midang tihbeidawnna tur intiamna tur hmun a nih loh thu a sawi.
Thawhtannia Khawlian Community Hall-ah Congress party zawm thar a lawm luhna inkhawmah MPCC President Lal Thanzara chuan, politics chu Pathianin ram rawngbawlna atana a pek a ni a, kohhran hi an thlarau lam nun enkawl tura a pek a ni a. Hei hian politics hi Pathian rawngbawlna tih a chiang hle a. Roreltute pawh Pathian ruat an ni a, ni tha lova roreltute pawh Pathian ruat an ni, a ti.
Lal Thanzara chuan ZPM sorkar hian an intiam angin sawhthing an lei lo va, hmunphiah pawh an lei lo a, an hlawhchhamah puhin, “Politics hi lal duh avanga midang tih beidawnna tur intiamna tur hmun a ni lo,” a ti.
ZPM sorkar hnuaiah kuthnathawktute lungngaiin an rum mek tih sawiin Lal Thanzara chuan, “Sorkarin thlai rate a ti chhia a, vaiho kutah loh theih lohna vangin pawisa tlemtein an hralh mek a, a lungchhiat thlak hle a ni,” a ti bawk.
Kristian sakhua dodaltu BJP mawngzawmtu MNF leh ZPM hnuaiah Mizoramin chunglam malsawmna beisei ngam chi a nih loh thu sawiin, MPCC President chuan, “Inthlan dawna hausa thut party leh Kristian sakhua dodala buai chimih tumtu BJP mawmgzawmtu MNF leh ZPM hnuaiah Mizoramin chunglam malsawmna beisei ngam chi a ni lo,” tiin, enchhin sorkar chu BJP laka an intiamna an tihhlawhtlin ngam leh si loh avangin BJP chuan Mizoram enchhin sorkar a hrek mek tih a sawi.