Tlang tak taka thusawi thin zaithiam lar, PINK chuan nu leh pate chu an fate lakah khauh turin a ngen a, a chhan chu a nu leh pate enkawlna kha nem ta ang se, a thihna a rei tawh ang a ti.
Mihring dikna leh chanvo humhalh bur tumna leh zalenna rama cheng zingah tharum thawhna lam hawi sawi mawi leh tlangaupui te hi mi tam takin an hreh tawh a, ril-a rah fate ngawih ngawih pawh ni se, hrem hi nu leh pa tam tak chuan an hlat tial tial mek.
Mahse, kum 45 mi PINK ngaihdan a dang thung a, a dinna ah a chiang hle bawk.
An thatna tur a nih phawt chuan tiang lek hreh lo tur leh, an duhzawng aia an mamawh leh tul zawk an hriat-thiam a, an zawm theihnan a tul chuan kut inthlak te pawh pawi a tih hran loh thu a sawi bawk.
Pink chuan, “Nu leh pate hian an fate an zilhna mai bakah hrem a ngaih pawhin hrem ngam se ka ti a. Ka nu leh pate pawh khan ka duh apiang min tih sakin, ka duh dan leh thu thu anga awm min phal sak selang chuan, ka thihna a rei tawh ang.
“Tun dinhmuna khawvel eng ka la hmuhna chhan pawh hi min enkawlna khawng veh vawh tak vang khan a ni,” a ti.
Kum 15 mi a nih laia In atanga hnawhchhuah a nih thu sawiin, “Ka phu hliah hliah, a nihna takah chuan, kum 8 ka nih khan min hnawtchhuak tur zawk an ni,” a ti bawk.