Aizawl: MNF Sr Vice President Dr R Lalthangliana chuan Mizoram Universal Health Care Scheme (MUHCS) chu mi rethei tan ni lovin, mi hausa tan chauh a duan a nih thu a sawi.
Thawhtannia Mizo Hnam Run chhung inkhawm hun hnihnaah health minister hlui, Dr R Lalthangliana chuan MNF an sorkar laiin healthcare scheme enkawl tur hian committee peng hrang hrang an siam a, Governing Body chu chief minister hovin an siam a. MHCS hman a nih theihna atan hian Asian Development Bank (ADB) atangin loan lak a nih thu a sawi bawk.
Dr R Lalthangliana chuan MNF sorkarin ADB atanga loan puk phalna a tihfel tawh chu tun thlengin ZPM sorkar hian a tak ram an la thlenpui lo tih a sawiin, “Harsa taka MNF sorkarin approval a lo tihfel tawh loan agreement ziah theih mai tawh tura peih tawh hi ZPM sorkar hian bawhzuia tihlawhtlin ngei turin ka ngen duh a ni,” a ti.
Health minister hlui chuan ZPM sorkarin MUHCS kalpui tura hma an lak hian rawn awm ngawih ngawih a ngaih heng – private hospital-te leh sorkar hnathawkin zawmkhawm pawl (FMGE&W) te pawh rawn lo leh system fel hlel leh buarchuar takin April 1, 2025 khan ram puma hman turin CM-in a tlangzarh tih sawiin, “Thil felfai tawk lo leh duhkhawp tawk lohna tam tak a awm niin a lang a, hei vang hian heng pvt. hospital leh FMGE&W te rawnin siam that thuai a tul tak zet a ni,” a ti.
ZPM sorkarin MUHCS a ruahman leh AB-PMJAY te hi scheme thuhmun leh a kalphung, healthcare bill dan inang, a hming chiah hrang a nih thu leh MUHCS hi package system-a duan a nih thu sawiin, “He scheme hnuaiah hian damloten an damlohna a zira package an lak ang chauh, damdawi in atangin an bill-sak thei dawn a ni. A bak zawng senso chu damloin a pek belh a ngai dawn a ni,” a ti.
MUHCS hi mi rethei tan ni lovin mi hausa tan chauha duan a nih thu sawiin Dr R Lalthangliana chuan, “A chhan chu RSBY hnuah AB-PMJAY kan han hmang chho a, he AB-PMJAY hian cashless 5 Lakhs package a keng tel nghal a. Chu package system chu MUHCS hian an entawn ta a. Entirnan, rilphir zai hi MUHCS Package-ah chuan Rs. 11,000 a ni a. Hei hian consumable items damdawi, OT charge, bed, nursing care zawng zawng khan a daih vek tur a ni tih a ni. Mahse, a daih teuh si lo. Package a nih chuan damlo khan Rs. 20,000 seng ta se, Rs 11,000 a pelhna zawng zawng kha a bill thei lo. Chuvangin, MUHCS hi AB-PMJAY lem (duplicate) mai a ni. MUHCS phenah AB-PMJAY hi an phumru a, tuna cashless an tih hi kum 2019 atangin central-in health care scheme cashless-in a kalpui daih tawh a ni,” tiin, a khaikhawm nan chuan MUHCS hi mi hausa leh mirethei inthliarna dik tak a nih thu a sawi.