Union Minister of State for Textile & External Affairs Pabitra Margherita chuan Waqf (Amendment) Act, 2025 chu dan siam that mai ni lovin, khawtlang nunphung chawisang tura hmalakna pawimawh tak a nih thu a sawi.
Thawhtanni khan Hotel Regency Conference Hall-ah thu thar thehdarhtute kawmin Margherita chuan Waqf (Amendment) Act, 2025 pass tak chungchang a sawi fiahin, “He dan hi siam that chauh lovin, chanchin hlui dik lo tak takte a siam tha nghal a. He dan siam that hi khawtlang hamthatna a hlen chhuah theihna tura ruahman a ni,” a ti.
Bill siam that pass tak hian khawtlang ei leh bar chungchanga inrelbawlna dik, langtlang taka hmalakna leh mi zawng zawng huapzo hmasawnna an zawnna kawnga kailawn pawimawh tak a ni tih sawiin, “He bill thar hian a bik takin hun rei tak chhung khawtlangah indaidanna zau tak lo awm thin chu a zim theih nan a pui dawn a, mipui aw leh theihna pho lan lama indaidanna lo awm thinte pawh a titawp tawh dawn a ni,” union minister chuan a ti.
Margherita chuan dan siam that a nih chhan bulpui ber chu mi zawng zawng huapzoa hmalak tumna vang a nih thu sawiin, “A vawi khatna atan Muslim community chhunga mi hnuaihnung zawkin state leh UT Waqf Board-ah mandatory representation an nei tawh dawn a ni. Hei bakah hian tunah chuan Waqf Board leh Central Waqf Council tinah Muslim hmeichhe pahnih tal an thawk tawh dawn bawk,” tiin, dan siam thatna hnuaiah hian hmeichhiate dikna chanvo pawh a dah pawimawh a nih thu a sawi.
He dan hi democracy dan dik tak kalpuia pass a nih thu sawiin Margherita chuan, thla nga chhung zet member 31 awmna Joint Parliamentary Committee (JPC) meeting vawi 38 neih a nih hnu petition 7,772 thlirlet a ni a, palai 284 nena inrawnkhawmna buatsaih a nih hnuah online-a rawtna maktaduai khat vel thlirlet niin parliament-a darkar 25 chuang sawihona neih a nih hnua pass a nih thu a sawi bawk.