Aizawl: Inhmun, lo/ram record vawn dan tihchangtlunna tur leh tihhmasawnna turin Aizawl khawpuiah drone survey neih tan a ni.
Land & Revenue Settlement Minister B Lalchhanzova chuan nimin khan Mualpui Helipad-ah sorkar laipui pilot project ‘National Geospatial Knowledge-based Land Survey of Urban Habitations (NAKSHA)’ hnuaia Aizawl chhim lama Municipal ward pakua (Ward XI – XIX) veng 43 huam drone survey-na tur a vai liam.
L&RS Minister B Lalchhanzova chuan NAKSHA chu pilot project kalpui mek anih thu a sawi a. He project hi a hlawhtlin chuan ram record vawn danah nasa taka hmasawnna a thlen dawn bakah, property record leh khawpui planning-ah data tangkai tak an neih theih a beisei thu a sawi.
He project hnuaia data hmang hian ram buai leh enho ngaite pawh dawhkanah chiang taka enho a theih tawh tur thu sawiin B Lalchhanzova chuan, ramin a mamawh tak a nih angin department chuan nasa taka an tangkaipui dawn a. Heng data hi a hmang tangkai duh department-te hnenah an hmantir tur thu a sawi bawk.
NAKSHA programme-ah hian India ram puma khawpui 153 thlanahte land record tha zawk siam tum a ni. Mizoramah pawh February 18, 2025 khan India ram pumpui rualin L&RS Minister-in khuh hawnna a nei a. Mizoram pilot atan hian Aizawl Municipal Council Ward XI-XIX (veng 43) thlan an ni a, bul tan nan Ground Control Points-te siamin helicopter-in LiDAR leh Photogrammetry survey neih a ni tawh a. Tunah hian drone-a oblique camera hmangin thla lak a ni leh ang a, chumi a map an siamchhuah hmangin leilunga endikna kalpui leh a ni dawn a ni.