Aizawl: Aizawl West II bialtu MLA Lalnghinglova Hmar, Minister of State chuan Mizoram Building & Other Construction Workers’ Welfare Board (MBOCWWB) hnuaia inziak, board member fa tamna school tan welfare board fund atanga inpuih theih dan an ngaihtuah dawn niin a sawi.
Nimin atanga tanin Minister Lalnghinglova Hmar chuan tun kar chhungin a bial chhunga sorkar school-te hi tlawh zawh hman a tum. Nimin khan Kanan, Vaivakawn leh Dawrpui Vengthar-a sorkar school pasarih a tlawh.
Lalnghinglova Hmar chuan sorkar school-te chu mipui nawlpui ban phak leh mi harsa zawkte chhawk zangkhaitu a ni tih a sawi a. “Zirtirtute pawh training palchhuak leh thiam zawk an nih avangin sorkar school hi mipui nawlpui luh duhna tura kan siam a ngai. Mipui rilruah sorkar school rinna tuh turin kan zavaia kan tanrual a ngai a ni,” a ti.
LESDE Minister ni bawk Lalnghinglova Hmar chuan sorkar school a lutte chu a tlangpuiin an nu leh pa te kut hnathawk an ni thin tih a sawi a. Zirlai nu leh pa, MBOCWWB hnuaia inziak lut thei te chu in-register tura finchhuah zel turin zirtirtute a chah.
MBOCWWB member leh an fate tan hamthatna hrang hrang a awm tih sawiin Lalnghinglova Hmar chuan, “MBOCWWB kaltlangin zirna chawisan kan tum mek a. Welfare Board member fa tamna school tan Welfare Board fund atanga inpuih theih dan a awm em tih kan ngaihtuah dawn a ni,” a ti. Zirlaite chuan lehkha zir pangngai piahlamah kut themthiamna (skill development) eng emaw tal an puakchhuah theihna turin ruahmanna siam an tum tih a sawi a ni.
Minister-in a bial chhunga school a tlawhnaah hian zirna hmasawnna atana rawtna awmte sawiho a ni a. Tui in tur thianghlim, inthiarna fai leh him, computer leh a kaihhnawih, hmeichhiate tana sanitary pad leh school mamawh hrang hrangte sawihovin, a theih chen chenah tihlawhtling tura hma lak a ni. Sawihona atanga rawtna hrang hrang awmte pawh tun academic session chhunga bawhzui tura ruahmanna siam a ni bawk.
MLA-in school a tlawhnaah School Education Department hotute ten an tawiawm a. Local Council leh khawtlang hruaitute’n anmahni veng huamchhung theuhah an lo tawiawm bawk.