Aizawl: Public Health Engineering (PHE) Minister Prof. Lalnilawma hovin nimin khan department hotute, Disaster Management & Rehabilitation Department hotute, Aizawl Municipal Corporation aiawhte leh tlawmngai pawl pathum – Central YMA, Centre for Environment & Social Justice (CE&SJ) leh Save The Riparian aiawhten tun hnaia Tlawng lui nu vak chungchangte leh Tlawng lui dunga lui te leh tui hnarte humhalh dan sawi hovin an thukhawm.
MINECO-a Conference Hall No. 2-a thutkhawmah hian tlawmngai pawl aiawhte hian Tlawng lui nut chhan nia hriatte leh hma lak dan tur zau takin an sawi a. AMC lam pawhin leivung paih chungchanga ruahmanna an siamte an sawi lang bawk a. Aizawl khawpui tui tlanna ber anih angin Tlawng lui humhalh chu mut mawh hnar mawha neih a tul thute sawilan a ni a, rawtna hrang hrang siam a ni bawk.
Thutkhawmah hian Aizawl khawpui mai nilo, Mizoram khaw tam tak tan Tlawng lui chu innghahna anih avangin, Tlawng dunga lui te leh tui hnar te humhalh dan turte sawi ho a ni a. Tlawng lui nut chhan chungchangah department mal anga hma lak mai a theih lo va, department hrang hrangte nen tanhoa hma lak a ngaih thute, hemi chungchang zau zawka sawiho leh hma lak anih theih nan chief minister kaihhruaina hnuaiah High Level Committee din nise tih te, leivung/bawlhhlawh paih chungchanga tun aia tha zawk inkaihruaina leh dan mumal zawk te siam nise tih te, Tlawng lui dung enkawl leh tui hnate humhalh nan hemi atana a hranpa a Master Plan duan a tul zia te, dan lova leivung paih thin chunga hremna khauh lekkawh a tul thu te leh The Mizoram (Protection of Rivers) Act 2023 chu a taka hma a tulziate chu rawtna leh thil sawiho te an ni.