Bangladesh prime minister hlui, Khaleda Zia-i chu British khawpui, London-a thla li a inenlawl hnuah Dhaka-ah a kir leh ta a, hei hian an rama sorkar lailawk dingin inthlan a puan thuai theihna turin a nawr ngei a rinna a lian hle.
Zirlaiten an nawrna avanga nikum August thlaa Prime Minister Sheikh Hasina-i an paih thlak hnua sorkar lailawkin a kaihhruai mek ramah hian Zia-i hi Thawhlehni khan a haw a ni.
Zia-i hi kaihhruai, Bangladesh Nationalist Party (BNP) hi a elpui ber, Hasina-i India-a a tlanchhiat tak avangin a boruak pawh lian tura ngaih a ni.
“Kan tan leh ram tan hun lawmawm a ni a. Mipui rorelnain hun harsa a tawh mek laia a lo awm leh ta hi kan ram tan chhinchhiahtlak a ni a. Khaleda Zia-i lo kir leh rual hian kan ram pawhin mipui rorelna lam kawng a zawh leh ngei kan beisei,” tiin BNP Secretary-General Mirza Fakhrul Islam Alamgir chuan a sawi.
Kum engemaw zat damdawi in lut leh chhuaka a awm hnuah a haw leh hian Zia-i hi Dhaka-a thlawhna tumhmun lian ber leh a chenna in panna kawng tluanin mi tam takin an lo hmuak a. Tumhmunah hian nawrlirhah a thu a, kum 78 mi BNP hruaitu hian amah lo lawmtute nuihin a ban ding lam a vai bawk.
Prime minister vawi thum, vawi hnih kum nga term leh vawi khat thla rei lo te ni tawh, Zia-i hi Hasina-i’n politics-a a el ber a ni a. Kum 2018 khan sum tihchingpen thubuaiah kum 17 lung in tang tura hrem a ni a, he thubuai hi Hasina-i rorel laia rel a nih avangin BNP chuan politics thil vang niin an sawi.
January khan Bangladesh-a Supreme Court chuan Zia-i hi thiam chantirin kum 10 lung in tantir tur pawh a titawp a. November, 2024 khan a thubuai dang, prime minister a nih chhunga dik lo taka $2,60,000 hmanga puhnaah pawh thiam chantir a ni tawh bawk.
Zia-i hi lung in a tang tawh lo va, Bangladesh-a a kir leh tak bawk avang hian Muhammad Yunus-a kaihhruai sorkar lailawk ding mek chuan inthlan hun a puan zui thuai rin a ni nghal.
Thuneitute chuan December-ah emaw, nakum June-ah emaw an huaihawt tur thu an lo sawi tawh.
Zia-i hi sipai roreltu, Ziaur Rahman-a thihsan niin a pasal hi kum 1981 khan thah a ni a. An rama hmeichhe prime minister hmasa ber niin Asia chhimchhak atanga ram hruai thei hmasa ber zinga mi a ni tel.
A fapa upa ber, Tarique Rahman-a chuan London-a a awm hlan khan BNP a lo kaihruai.
Prime minister atana thlan hnuhnung ber, Hasina-i kha kum 1971-a Pakistan atanga an indan theih nana indona hruaitu, Sheikh Mujibur Rahman-a fanu a ni ve thung.