Aizawl: Larsap General Vijay Kumar Singh chuan digital lama tan lak a tul thu sawiin, eirukna nuai bo nana hmanraw pawimawh tak a nih thu a sawi.
Mizoram University (MZU) chuan nimin khan sorkar laipuia Department of Science & Technology, MZU leh IBITF, IIT Bhilai tangkawp buatsaih, ni hnih awh tur ‘National Workshop on AI-Driven Financial Empowerment for Mizoram’ chu MZU Auditorium-ah khuallian niin larsap hian a hawng.
MZU chief rector ni bawk, General Singh chuan Artificial Intelligence (AI) tangkai taka hman a nih theih nana inzirtirna buatsaih a ni chu lawmawm a tih thu sawiin, IIT Bhilai-in North Eastern Region tana Tribal Area Sub Plan Scheme hnuaia AI Driven Financial Technology Project 36 a kalpui zinga 11 zet Mizorama kalpui a ni chu lawmawm a tih thu a sawi.
Larsap chuan AI hmangin tunhma lama thil tih theih loh leh mihring tana awlsam taka tih zung zung theih lohte hun rei lo te chhunga peihfel theih a nih thu a sawi a. Digitisation lama tan lak a tul thu leh tha taka kalpui a tul thu sawiin, “Hei hian langtlang, innghah ngamna leh rinawmna a kengtel a, eirukna nuai bo nana hmanraw pawimawh tak a ni,” a ti.
He hunah hian NIT Mizoram hnuaia project pakhat, ‘Economic Optimization Platform for Public Transport System for Mizoram’ chu thlirho a ni a. He mobile application hmang hian transport department nena tang hovin, Mizoram chhunga taxi hrang hrang leh autorickshaw-te online hmanga book theihna tur siam mek a ni a, hman theih tura peih fel thuai beisei a ni.