Aizawl: Mizo Zirlai Pawl (MZP)-in HSLC-a top 10-a Mizo tlingte chawimawina hun an buatsaih hmanpuitu, Home Minister K Sapdanga chuan Mizote chu a nuam chin atanga an chet chhuaha India ram zau zawk an dai dar a tul hle tih a sawi.
Vana Pa hall-a inkhawmah K Sapdanga chuan zirlai chawimawite hi kawng hrang hrangah Mizoram tana hmathlir leh innghahna tur an nih avangin taimakna, tumruhna leh teirei peihna nen lehkha zir chhunzawm turin a chah.
Home minister chuan zirlaite chu tun atanga an tuina tak kawng zawh fuh a tul a, an thiante subject lak emaw, an nu leh pa, chhung leh khatten zir tura an duh ang chu an ching lo chho tial tial nia a hriat thu sawiin, “Rilru fim tak pua kan zir zawm tur kan thlan thiam a tul takzet a ni,” a ti.
Hun eng emaw tilai atang khan Mizo zingah All India Service (AIS) direct-a tling an tlem takzia an sawi zing ta hle a, hei hi veiawm a tih thu sawiin K Sapdanga chuan, “Mizo thalaite hi kan nuamsa lutuk ta em ni ka ti fo thin,” a ti a. Mizo mipui tuihalna, rualawhna leh ramin tuna a mamawh ber chu AIS-ah Mizo an luh hi a ni tiin, “Mizoten kum 10 chuang direct-a IAS inziak tling kan nei tawh lo a, IPS pawh kan neih lohna a rei tawh hle. Mizo zirlaiten chonaah ngaiin All India Service-ah lut turin theihtawp lo chhuah rawh u,” tiin zirlaite a fuih.
Mizote zingah Mizoram chhunga awm thlakhlelhna a len ziate hi hmuh hmaih rual a ni lo tih sawiin K Sapdanga chuan, “State chhungah sorkar hna kan thawh theih chuan kan lungawi tlang viau niin a hriat,” tiin, a nuam chin atanga an chet chhuah a, India ram zau zawk an dai dar a tul hle a. Chumi tih duh tak takna an neih hunah chuan central sorkarin hna hrang hrang a lakahte hian tling an tam sawt ngei dawn tih a sawi.
MZP Vice President Dr. C. Lalremruata kaihhruai inkhawmah hian MZP President H Lalthiangthlima pawhin thu a sawi a. Zirlai an chawimawite hi mipa 13 leh hmeichhia pakua an ni a. Zirlaite hi chawimawina thuziak, pawisa fai leh lehkhabu hlan an ni.