Aizawl: Tlawmngai pawl Foundation For Drug-Free Mizoram chuan ruihhlo laka fihlim tura beihpui thlakin district headquarters zawng zawnga an tlawh chhuak.
An pawl indin tirh atanga hmathlir an lo siam tawh angin, Mizorama district hqrs. zawng zawngah ruihhlo laka fihlim tura beihpui an thlakna chu nimin khan Siahah Don Bosco School-ah an hmang zo a. He hunah hian zirlai 482 te ruihhlo laka fihlim turin an intiam.
Social Welfare Department leh Foundation For Drug-Free Mizoram te tangkawpin Siaha-a hun an hmanah hian Resource person Dr. Zorinsangi chuan ruihhlo laka fihlim tura inbuatsaih hun tha ber chu tun hun hi a ni, tiin, thutlukna tha ber siam turin zirlaite a fuih a, mihring taksa, rilru leh thlarau thlenga khawih chhe thei ruihhlo malmak ngam tura mi huaisen ni turin a sawm.
Foundation For Drug-Free Mizoram chuan kum 6 chhung an pawl zinkawngah Mizorama district headquarters zawng zawng an tlawh chhuak thei ta chu mellung pawimawh tak anih thu an sawi a. Hemi hlawhtlinna tura Pathian hruaina an dawn leh Mizoram sorkarin an hriatpuinaah leh Social Welfare Department, Health & Family Welfare Department leh Excise & Narcotics Department leh rawngbawlna hawnsak thintute – School, College, Institution leh Kohhran tin te chungah leh mahni insengso a, penchhuak t an member te chungah lawmthu an sawi.