India ramah mihring pungchak lutuk buaipui a nih mek laiin, South Korea-ah chuan nupuii/pasal neih tum lo thalai pung thur thur chu sorkar ang pawha luhaina tham a tling ta.
Heti ang zela a nih chuan kum 28 a liam meuh chuan Korean thalai pahnih zela pakhat chu nula/tlangval an ni dawn tihna a ni a, sorkar lama atang chuan nupui/pasal neih theih kum bithliah theih anih laiin, nupui/pasal nei ngei ngei tur erawh chuan a tilui thei bawk si lo a ni.
National Statistics Office tarlan danin, nikum khan nupui/pasal nei lo single hi maktaduai 7.2 (Nuai 72) an ni der tawh a, 2050 ah phei chuan mi panga zela pahnih chu single an ni dawn tihna a ni bawk a, a manganthlak hle.
Zawhna pawimawh leh lian tak lo awm ta chu, engvanga South Korean thalaite’n nupui/pasal nei a, chhungkaw din an hreh em em le, tih hi a ni. An ram economy kalphung hrim hrimah chuan mahni puala chhungkua nei a, enkawl chhoh hi an hlauthawng deuh vek tawh ni maiin alang.
Hna tha tak thawh tur neih loh vang te, sum leh pai senso lo pung chho nghal mai tur te ngaihtuahin, chhungkaw din chu thil awhawm leh chakawm takah an ngai reng reng lo. Zirchiannaa nupui pasal nei za zela 12% te chuan fate enkawl seilen chu phurrit namai lo tak a nih thu an sawi ve bawk a. 25% ve thung cuan kawppui tur an hmu mai lo emaw kawppui mamawh lem lo angin an sawi ve bawk.