HSLC leh HSSLC result puan a ni tawh a, nikum aiin heng board exam pahnihah hian zirlai pumpui pass percentage a sang zawk ve ve, a lawmawm hle.
Zirna hi kawng engkima hmasawnna leh changkanna rahbi pawimawh tak mai niin, khawvel hian zir sangte nge nge bawk hi a ngaihven a, a ngaisang thin.
Tun tum sorkar kan hrawn mek hian education minister tha tak an nei a, academic line-a mi hlawhtling leh entawn tlak tak pawh a ni bawk. Ani remhriatna leh kaihhruaina hnuaiah zirlaite result pawhin kawngro a su a tih theihna chin a awm awm e.
Chutihrual erawh chuan hemi chinah hian duhtawk mai lo se, hmasawn lehzual tura ke an pen nasat zual sauh pawh a tul awm e. Chu chu education in a tum pakhat pawh niin a lang.
Sorkar school te hian engmah fee ngai lovin zirlaite an enkawl a, zirtirtute lah training chhuak vek, engkim expert an ni tawh bawk. Chutiang zirtirtute enkawlna hnuaiah chuan naupangin nuam a ti dawn tih a chiang a, a enkawltute tan kawng pawh a awlsam zawk ngeiin a rinawm bawk.
Hetiang hi kan dinhmun a nih tawh laia zirlai board exam-a pass nei miah lo zirna in an la awm thei fo erawh hi chu ngaimawh tham a ni a, a tul chuan zirtirtute pawh sawn chhuah leh dah belh ngam a tul hle.
Kan zirna in hma a sawn zel theih nan a enkawltu minister hian huaisen takin, a result hriat ngei turin, hmasawn zawngin ke han pen zel mawlh teh se.