Kan ram thenawm Pakistan nen buaina lian tak neiin, boruak a inmung nasa hle tih kan hria a, indo mai thei kan nih avangin sorkar chuan mipuite inralring turin ramchhung hmun hrang hrangah thuchhuah a thawn bawk.
Hetiang hi kan dinhmun a nih avangin mitin kan fimkhur a ngai a, sorkar laipui chuan state tin CM te chu an state chhunga ruahmanna felfai nei turin a hriattir tawh bakah, mipuite fimkhur a tul thu sipai lam hotute chuan an sawi chamchi bawk a ni.
Kan ramah ngei pawh nilaini khan civil defence mock drill te neiin, buaina thlen palh thulha ruahmanna tha a awm theih dan tur kan inhrilh thar ve a ni ber a, zawm erawh a hlawh lutuk lo niin a lang thung.
Social media a chak tawh a, mitin hi news reporter kan ni ber tawh a, youtube lamah nise a hman hmanin channel rintlak ni lem lo pawh an siam tawh bawk. Tun ang boruak hi fimkhur a hun zual lai, mitinin kan kutzungpui kan hman tim hun lai tur tak a ni tih erawh hre thar ila, a hnu lama buaina kan neih zui loh nan media rintlak leh chanchinthar rintlak, hna bera nei journalist te thu ngaihchan i thiam ang u.
A hman hman leh a rem remte thu post/paste hun a ni lo tih hre tel ila, fimkhur takin sorkar thu i ngaichang thiam zel ang u.