Chief Minister Lalduhoma chuan state pawnah artui lei nan sum a liam hnem em avangin eng emaw zat thar chhuah ve dan tur tal dap tha a tih thu a sawi.
Nimin khan Thenzawl AH & Vety Farm-ah Chief Minister Lalduhoma hian NABARD RIDF sum senga din tur, artui thar chhuahna hmunpui lungphum a phum a. January 19, 2024 khan Shillong-ah NEC Plenary vawi 71-naah a tel tumin Mizoramin artui lei nana sum a sen nasatzia leh thar chhuah ve a mamawhzia a sawi thu a sawi.
Chief minister chuan Mizo mipuiin artui hi an ei nasa a, an taksa tan pawh a tha a. Mahse, an thar chhuah ve loh avangin kum tin artui lei nan Rs vbc 22 chuang sen thin a nih thu sawiin, “Artui thar chhuaktu state lamah kan pawisa hi a liam hnem em em thin. Chuvangin, kan mamawh zawng zawng thar theihna farm kan din thei lo a nih pawhin eng emaw zat kan lo thar chhuah ve dan tur tal kha dap tha ka ti,” a ti.
AH &Vety minister leh official-te nen ruahmanna an siam tih sawiin Lalduhoma chuan, “Thenzawlah hian arpui nuaih khat vel vulh theihna, ni tin artui 70,000 vel tal thar theihna din kan titlu a, sum hi NABARD RIDF atangin Rs 20.64 Cr vel puk kan remti ta a ni,” a ti bawk.
Chief minister hian nimin vek khan Thenzawl Dilpuia Bailey Bridge dawh tur lung phumin Mizo sial vulh punna hmun a hawng bawk.
He hunah hian AH&Vety Minister C. Lalsawivunga, RD Minister Prof. Lalnilawma leh V. Malsawmtluanga, MLA te an tel.