Aizawl: Mizoram Lok Sabha MP Richard Vanlalhmangaiha’n Nilaini tlai khan Union Minister of State for Road Transport & Highway Ajay Tamta chu kawmin, furpui thlen hma ngeiin Vairengte leh Sairang Buichali inkar kawng a tam thei ang ber siam hman a nih theih nan hma la turin ngen.
Union minister chenna ina an inkawmnaah MP Richard Vanlalhmangaiha chuan, Mizorama ruahtui tlak hun chhung a rei avangin, tuna National Highway No. 6 (54 ni thin), Mizoram chak lak luhna ber Vairengte leh Sairang Buichali inkar kawng siam thatna tura hmun thenkhata tender an chhuah tawh chu a rang thei ang ber leh a tam thei ang ber furpui thlen hma ngeia siam hman turin a ngen.
Richard Vanlalhmangaiha chuan Mizoram chu ruahtui tamna hmun a nih avangin, Mizoram chhunga kawngpuite chu alo tlo zawk theih nan a tam thei ang ber chu concrete pavement (rigid pavement) a siam a nih theih nana hmalakpui turin a ngen a. Concrete pavement hi Mizoram sorkar leh chief minister duh dan a nih thu a thlen nghal bawk.
Union minister pawhin theihtawp a lo chhuah tur thu a lo hrilh a ni.