Aizawl: Leader of Opposition & MLA Lalchhandama Ralte chuan nimin khan SIRD-PR buatsaih Darlawn RD Block chhunga Village Council Member-te pual ‘Interaction Session of Village Council Members of Darlawn RD Block’ a hmanpui a. VC Member kalkhawmte chu mahni ram inpe lo turin a chah.
SIRD – PR Auditorium-I, Leitan-a hun hmanah khuallian Lalchhandama Ralte, MLA chuan VC-te chu sorkar hmasain thuneihna a pek belh bakah, chhiah lak kawngah a thuam chak tih a sawi a. Central Ministry hnuaia Panchayati Raj model mil zela tihchangtlun chhoh a nih thu a sawi.
Hmar tlangdung chu Mizoram kawtchhuahpui a ni dawn tih sawiin Lalchhandama Ralte chuan, “National Highway pahnihin min paltlang dawn. Hmar tlangdung landlock tia sawin thin chu tunah hian road alignment tih mek a ni a, zangnadawmna kalpui chhunzawm tur a ni. VC Member-te chu mahni leh mahni ram inpek loh tur. Nakin lawkah thangtharten in thlan an la rawn hai duh mai ang,” tiin VC-te chu ram peka fimkhur tur leh hmasawnna ngai pawimawh turin a chah.
Tuivawl bialtu MLA chuan a mipuite chu sorkar healthcare-a inziak lut tura ngenin, “MLA leh VC-te buaina pui ber pakhat chu damlote inenkawlna senso phuhruksak a ni,” a ti a. A bial chhung VC-te chu khawmpui lian hrang hrang thleng mai tur atan inbuatsaih tur te, faina leh intodelhna kawngah hmasawnna kawng zawh turin a fuih a, duhsakna a hlan bawk.