Aizawl: Minister of State Lalnghinglova Hmar chuan mipui rilruah sorkar school rinna tuh turin an zavaia an tanrual a tul thu a sawi.
Aizawl West-II bialtu MLA Lalnghinglova Hmar chuan a bial chhunga sorkar school-te tlawh chhunzawmin, nimin khan Dinthar, Dawrpui Vengthar leh Tuikual North-a school pariat a tlawh.
School hrang hrang a tlawhnaah Lalnghinglova Hmar chuan, mipui rilruah sorkar school rinna tuh turin an zavaia an tanrual a tul tih sawiin, “Zirtirtute pawh training nei leh thiam zawk an ni a, sorkar school hi nu leh pa nawlpuiin an fate luhtir an duhna tura siam turin thahnem kan ngaih lehzual a ngai a ni,” a ti.
Zirtirtute chu an zinga pakhat lek kal tlai pawhin school naupangte a nghawng thin tiin, zirtirtute tan kal tlai a thiang lo tih a sawi bawk a. Aizawl West-II a zirtirtute chu an tlai ngai lo tih theih tura tang turin a chah a. An zirlaite chu result ringawt piah lama hmasawnna leh thiamna tlo an neih theihna tura theihtawp chhuah turin a chah bawk.
LESDE minister ni bawk, Lalnghinglova Hmar chuan, “MBOCWWB member fa tamna school tan Welfare Board fund atanga inpuih theih dan a awm em tih kan ngaihtuah dawn a. Welfare board kaltlangin zirna chawisan kan tum mek,” a ti.
May 6, 2025 khan Kanan, Vaivakawn leh Dawrpui Vengthar-a sorkar school pasarihte tlawh tawhin, ruahman dan angin vawiin hian a bial chhunga sorkar school-te hi a tlawh zo ang.