A nihna dik tak leh him tak tak lova inngaihna avangin Sir Elton John (78) chuan hun rei tak room-a inkharkhipin, a tawm fo tawh a, manganna nasa takin a bawhbuai zuina chuan mahni intihhlum tumna hial vawi tam a thlen hman, a ti.
Hmangaihna lamtluang a zawh fuh thin loh avangin a lar vanglai pawh khan nun ninna leh kham ngawih ngawihna a nei nasa. A lehkhabu, “Me: Elton John” ah khan mahnia intihhlum a tum dan chipchiar takin a awm a ni.
Elton chuan, “Ruihhlo ka buaipui a, mimal nun buai nen, chhiatna hi a ringawt. Karlovah heng thil tha lote hian salah min chhawr hmiah hmiah,” a ti bawk.
Zankhat chu a band thar te nen Caribou studios-a an awm laiin ruihtheihthil a ti nasa lutuk chu OD-in a thi hman thelh. A hnuah phei chuan a buaina leh manganna thlentu hi eng nge a nih pawh a hre tawh lo hial.
“Heti taka ka nun ram chau leh beidawnna kha thil dang vang ni lovin, hmangaihna lamtluang zawhfuh loh leh vanduai thin vang te pawh a ni ang.
“Bul tanna ka neih pawhin a tawpah a tluang lova, mittui bawk a lo sur leh zung zung a, engmah kha a fuh thei lo a ni,” tiin hun kal tawha a chunga thil thleng a sawi chhuak a ni.