Aizawl: St. Joseph Higher Secondary School, Ramhlun North & Bawngkawn, Aizawl chuan Dawrpui Multipurpose Hall-ah ‘Felicitation of HSLC & HSSLC Results 2025’ neiin, Education Minister Dr. Vanlalthlana chuan khuallian niin a hmanpui a, zirlaite chu mahni bula mite pui thin tura inbuatsaih turin a chah.
Khuallian Dr. Vanlalthlana chuan zirlaite chu midangte pui thei turin inbuatsaih tura chahin, “Chu chu mi rothap nihna, mi dang puih kan chin than chuan kan thanhnan ang a, chin thanah kan nei ang a, mi ropuiah min siam dawn a ni,” tiin mi dang puihna dil a inthlahrunawm loh ang bawkin, mi dang pui tura inbuatsaih turin zirlaite a fuih.
Zirlaite chu thian kawm turah fimkhur a ngaihzia sawiin minister chuan, “A bikin mipa ngat phei chu thiante azirin kan danglam thei khawp mai. Thian thlang fimkhur turin ka chah a che u,” a ti.
Hlawhtlinna hi Pathian vang a nih thu sawiin, “Kan hlawhtlinin Pathian vang kan ti a, a hnu zelah hei hi kan chhawm nun a ngai. Kut lehlam pang thawhtu Pathian hi hre reng rawh u,” tiin khuallian chuan ram veina nena lehkha zir turin a chah bawk.
Education minister chuan zirlairte chu zawhna inzawh thin turin chona siamin, “Hna a awm lo kan ti a, workshop leh in satute hnamdang hi engati nge an tam em em si le? tih te leh a dangte inzawt thin ula, zawhna inzawt turin ka cho che u,” a ti.
St. Joseph HSS hian HSLC leh HSSLC 2025 exam-a pass tharte lawmpuina a neih bakah, Top 10 an neihte chawimawina hun an hmang a. Principal C. Laltlansanga chuan kal khawmte leh sawm bik te lawmpuina hun a hmang a ni.
St. Joseph HSS atang hian HSLC leh HSSLC Exam hi 641 an awm a, pass 599 awmin, H/S bikah Top 10 tling 8 an awm a, HSS-ah Top 10 hi 11, an vaiin Top 10 hi 19 an nei a ni.