India batter hriat reng hlawh tawh tur, Virat Kohli-a chuan Test cricket a chawlhsan tih a puang.
Tun nipui lo awm tur, June 20 atanga Test vawi nga khel tura England an tlawh hma lawkin captain Rohit Sharma-a’n Nilainia a chawlhsan tih a puan chu a zui ve ta a ni.
Kum 36 mi, Kohli-a hian Test vawi 123 khelin run 9,230 a siam hman a, tum khat vuaka run 46.85 siam zel ang a ni.
“Test cricket-a ka inlan tan atangin kum 14 a lo tling ve ta a. He thilin ka zin kawng min hruaina hi ka lo suangtuah phak ngai loh a ni a. Min fiah a, min her rem a, ka nun kawngah zirlai tam tak min zirtir a ni,” a ti.
Kum 2024 khan India-in World Cup an lak hnu lawkah Kohli-a hian T20 international khelh a lo chawlhsan tawh a, one-day international erawh a la khelh chhunzawm rin a ni.
Kum 2011-a West Indies hmachhawna Test a khelh tan hnuah Kohli-a hian India chu captain niin vawi 68 a khelhpui am vawi 40 hnehna a chanpui a, hetiang inkhelhna chia India hlawhtlinna chanpui tam bertu a ni.
“Kawr var haa inkhelh chawlhsan tur hian mi mal thil thuk tak pawh a awm a. Ka ngawi reng a, miin an hmuh loh thil tenau tete pawh a awm a ni,” a ti.
“Ka khel tawh lo tur hi thutlukna siam awlsam a ni lo va; mahse, a dik niin ka hria a. Ka zawng zawng ka pe a, ka beisei aia tam min pe let bawk,” a ti.
Kohli-a hi a khelh rualpuite zingah ball vuaka mi ropui pali zinga pakhata ngaih a ni a. England atangin Joe Root, Australia atangin Steve Smith leh New Zealand-a Kane Williamson te nen huang khata dah niin Test century vawi 30 a siam hman bawk.
Test-a century a siam hnuhnung ber chu November thlaa Australia laka a siam kha a ni a, hei hi thla 16 hnu, innings 15 zet a siam loh hnua a siam a ni.
January, 2020 hnu lamah Test vawi 39 khelin century vawi thum chiah a tlin a, tum khat vuakah run 30.72 zel siam ang a ni a, a tlahniam ve hret a ni.