Aizawl: Aizawl North III bialtu MLA K Sapdanga, Home Minister chuan nimin khan a bial chhunga HSLC top 10-a lang mi pahnih hnenah lawmpuina pawisa leh thuziak a hlan.
Bialtu MLA K Sapdanga hian a bial chhunga HSLC top 10-a lang pahnih, Lalruatkimi Khiangte d/o Lalhmingthanga, Chanmari (8-na) leh Harry Lalruatfela s/o Lalrinchhana, Chanmari West (10-na) te chu an chenna inah kalchilh ve vein, lawmpuina sumfai Rs 10,000 leh memento a hlan a ni.
Lawmpuina hun hmannaah K Sapdanga chuan a bial chhungah HSLC top 10 chawimawi tur mi pahnih an nei thei chu lawmawm a tih thu a sawi a. Result chhuah hlimah lawmpuina inhlan duh viau mah se, class XII result chhuak leh mai tur a nih avangin an nghak rilru a, vanduaithlak takin Class XII lamah top 10 chawimawi tur an bial chhungah an neih tak loh avangin, an tlai phah tak hret thu a sawi.
K Sapdanga chuan an chawimawite pahnih chu an kal zelna turah duhsakna a hlanin, hlawhtlinna nasa zawk an chan theihnan tang sauh sauh tura a beisei tlat thu a sawi. Anni bakah a bial chhung, Aizawl North III huamchhunga zirlaite nasa taka lehkha zir sauh sauh tura chahin, kum 2026 result chhuah hunah chuan Class X leh Class XII-ah top ten chin chawimawi tur tun aia tam hi an neih ngei a beisei thu a sawi bawk.
Bialtu MLA-in lawmpuina a hlannaah H. Lalremtluanga, AMC Corporator Ward no. VI; Chanmari LC, Chanmari ZPM Unit hruaitu leh Chanmari West ZPM Unit hruaituten an tawiawm a ni.