Aizawl: Mizoram State BJP chuan ‘Operation Sindoor’ chu mipui chhan nan leh ram venhimna atana indona a nih angin, ram pasaltthate zahna leh an thlawpzia lantir nan vawiin hian kawng zawh an huaihawt dawn.
Ruahman lawk dan chuan, kawng zawh hi vawiin chhun dar 12 hian neih tur a ni a. War Memorial, Treasury Square atanga Van pa hall kawt thleng zawh tur a ni a. Kawng zawh hnu hian inkhawm tawi buatsaih tum a ni bawk.
BJP Mizoram State President Vanlalhmuaka chuan, firfiakte thlawptu Pakistan hian an pawikhawih nasa tak avang hian an tuar ngei tur tih chu an dinna a nih thu leh, Pakistan awp Kashmir leh Pakistan hmuna ralmuang taka awm firfiakte chu PM Modi kaihhruaina hnuaiah India sipaiin an tihchhiat nasat thu a sawi.
Vanlalhmuaka chuan he indonaah hian Mizo tlangval huaisen eng emaw zah ral hmatawngah awmin, ram tan zan mu lo leh thih huamin ral an do tih a sawi a. Ral hmatawnga awm Mizo tlangval sipai huaisen chhungte, ex-serviceman leh tlawmngai pawlte, politicial party hrang hrang leh Mizo mipui, party bil awm lova India mi an nih anga kawngzawh buatsaih a nih angin, he hunah hian tel vek turin mi zawng zawng a sawm a ni.