Aizawl: Congress Thalai chuan chief minister Lalduhoma’n a lo intiam tawh angin, ruihhlo ngaite enkawlna turin Community Healing Centre din thuai turin Mizoram sorkar an ngen.
Nimina an thuchhuahah MPYCC chuan, tun hnai kum hnih chhung hian Mizoramah nasa takin ruihhlo a hluar a. Ruihhlo ngaite buaipui leh enkawlna kawngah harsatna hrang hrang sawi tur a tam hle a. Ruihhlo ngai enkawltu Centre pakhatah phei chuan harsatna namen lo a thleng mek a. He thil thleng avang hian ruihhlo ngai leh he Centre a awm mi tam tak chu an duh anga chhuah zalen an ni a. Heng zingah enkawltu mumal neilote veng hrang hranga an zalen tak siah chuan sual a punlun leh dawn tih hriain veng tam takah mipuite chi-ai-in, fimkhur turin an inchah nasa hle. He thil thleng hi pawi an tih thu an sawi.
MPYCC chuan kum 2023 MLA inthlanpui atana ZPM MLA Candidate tur puan anih tum a, khatih laia ZPM Leader Lalduhoma’n an sorkar chuan ruihhlo ngaite enkawlna tur UNO hriat tham, World Health Organisation nena tang tlangin Community Healing Centre an din tur thu sawiin, chutah chuan ruihhlo ngaite an enkawl tur thu leh an chhuah huna mahni kea ding thei turin an hnathawh tur thlenga siamsak tura a insawi angin, Mizoram sorkar chu he centre din tur hian hmalakna a awm tawh em tih sorkar chu zawtin, hmalak a nih tawh chuan hmalak a nih dan mipui hriata puangzar turin an phut a ni.