Politics leh inpuhhmingchhiatna hi a kalkawp a ni ber tawh a, thangthar zawkte tan phei chuan political party a luh a, politics hmanga ram siamthat tum hi harsa leh theih loh, tih chi loh a hriatna a la awm zel ang tih a hlauhawm hle.
Politics hi dik taka a kal chuan hmasawnna leh ram thatna a nih rualin democracy rama awm kan nih avangin mahni awmna party sawi mawi leh inpuhhmingchhiat zawnga kan kal ta fo erawh hi chu a pawiin, democracy tihmelhemtu kan ni zawk emaw ni chu aw tih mai a awl thin.
Tun hnaiah Lawngtlai West bialtu MLA chu kan rorelna in sang berah beih a ni a, a beitu leh sawichhuaktu pawh house leader ni a, kan ram hruaitu lu ber ni bawk a ni. Amah pawh a hamhaih letlingin, sawizui a hlawh hle a nih kha.
Ram hruaitute hi an dik emaw dik lo emaw, bialtinin kan aiawh tura kan thlan tlin, kan aiawha rorelna in sanga thu tura kan thlanchhuah an ni a, inzahtawn leh zai ngaia kal tur nia rinna pawh a lian lo thei lo. Chutih rual erawh chuan MLA an beihna hi a dik leh dik loh lam chu sawi lo ila, inzahtawn taka thil kalpui tur a nih laia hetianga lo ri chhuak ta hluai erawh a platform a fuh chiah loin a lang.
Bail lak leh lak loh thlengin sawizui a hlawh ta zel a, a tanna lamah MLA pakhat lah a tang nain, sorkar siamtu lam lahin theihtawpa hlin zel dan tur an ngaihtuah emaw tih mai tur a ni bawk. Thangthar zawkte tana politics nun mawi kha vawng zui thei se erawh a va tha em.