Aizawl: MNF Aizawl East-I Block chuan tun hnaia Zuangtuia hot mix plant kang chungchangah PWD in Zuangtui khawtlang laka FIR an theh luh chu hnuk kir turin an ngen a, an hnukkir lo a nih chuan Zuangtuia PWD office-a thawktute chu tiam chin awm lovin pisa kai thei lo turin dan an tum.
Nimina thuchhuah an siamah MNF Aizawl East-I Block chuan, Zuangtui khawtlang mipuiin hot mix plant an duh lohna an lan tir chungchangah an tawrhna an hriatthiam thu leh an thiam ang tawka hma an lo laknaah tihsual palh an neih chuan, sorkar pawhin hrethiama ngaidam tura an ngensak thu an tar lang.
Hot mix plant hi Pollution Control Board pawhin a awmna hmun a dik loh dante, khawpui area atanga km 1 aia hnai lo leh sakhaw biakna hmun atanga km 0.5 aia hnai loah tih ni mah se, khawpui chhungah leh biak in kawt deuh chiahah a awm thu te, khawlin boruak bawlhhlawh a tihchhuah tam loh nana diesel hman tur a nih laia, diesei aia chhe zawh leh la thlitfim loh crude oil hman a ni te, khu leh rim a chhuah tam loh nana khawl hnuaia tui awm reng tur tui dah a nih ngai loh thute leh, khawtlang pawhin pipe leia luikawr tui laksak tura an tih pawh ngaihsak an ni ngai lo chu thil felhlel tak a nih thu an tar lang bawk.
MNF Aizawl East-I Block chuan lirthei neitu mipui lakah sorkarin pollution certificate an khauh em em laia, sorkar zawkin dan hre reng chunga a bawhchhia chu mipui tham lohna a nih thu sawiin, May 15, 2025 ral hma ngeiin dan dik lova khawl hman avanga harsatna thleng chungchangah PWD in an FIR theh luh an hnukkir lo a nih chuan, Zuangtuia PWD office-a thawktute chu tiam chin awm lova dan an tum thu an tar lang.