Aizawl: Mizoram thingtlang khuaa chhungkaw harsa zawkte chhawmdawlna kawnga chak zawka hmala turin Rural Development & Administration Department leh Bharat Rural Livelihood Foundation (BRLF) te chuan kum thum chhung atan thawhhona thuthlung (Memorandum of Understanding (MoU)) an ziak.
Thawhhona thuthlungah hian Minister Prof Lalnilawma pisa-ah ziah a ni a. Rural Development & Administration Department aiawhin V. Lalengmawia, Additional Secretary leh Bharat Rural Livelihood Foundation (BRLF) aiawhin Kuldip Singh, CEO ten an hming an ziak a ni.
Thawhhona thuthlungah hian BRLF hian Mizoram chhunga rural development kaihhnawih, sorkar scheme leh programme hrang hrangte awmze nei zawk leh hlawk zawka kalpui a nih theih nan state sorkar a thawhpui ang. Natural resource management hnuaia hma lakna hrang hrang tuihna humhalh, ramngaw leh nungcha humhalh bakah, agriculture productivity lama thingtlang mite’n hmasawnna an neih theihna tur kawngah department hrang hrangte leh an scheme neih hrang hrangte hmanga thawhho (convergence) dan tur ruangam a siam ang. Central scheme hrang hrangte awmze nei zawka kalpui a nih theihnan Rural Development & Administration Department nen an thawk dun dawn a ni.
He thawhhona hnuaiah hian thingtlang loneitute tan tui luang ral tur humhalhte, groundwater management an neih theihna tur leh non-pesticide management-based agriculture nasa zawka kalpui a nih theihnan hma lak a ni ang a. Loneitute thar chhuahte hlawk zawka kalpui tum a ni bawk. BRLF hian a tul angin loneitute hnenah training an pe thin bawk ang.