AZL: Commerce & Industries Director Maria CT Zuali chuan nimin khan Serchhip a tlawhin, Serchhip Bawrhsap Paul L.Khuma leh khawtlang hruaitute nen DC Meeting Hall-ah Darnam tlanga din tum Serchhip Industrial Estate chungchang a sawipui.
Industries Director chuan Serchhip district-ah Industrial Estate chawikanna tur project thehluh a ni dawn tih sawiin, Revenue department te nen an enho hnuah DIC Complex, Darnam Tlang chu Industrial Area a puan a, a hmun a zim avangin Plug & Play Facility (Flatted Factory) dah ni se, tia an rel thu a sawi.
Darnam veng mipuiin pisa sawn an phal loh avanga harsatna awm chungchang sawifiahin, pisa lak sak ni loin a aia changtlung zawk an neihna tur ruahmanna a ni zawk tih khawtlang hruaitute a hrilh.
Maria CT Zuali chuan Flatted Factory hi building pakhata factory/unit tam tak awm theihna tur a ni a. Serchhip district pawh hian Flatted Factory a neih ve ngei theih nan hma lak mek a ni a, Rs.14,99,00,000 man hu project siam mek a nih thu a sawi.