Chief Minister Lalduhoma chuan Lengpui kawng Pukpui bul ko hlauhawm siamna tur leh Ngaizel lung tla thin tihnepna leh chhiatna thleng fo thin pumpelhna tur detial project report (DPR) tha tak siam ran tha a tih thu a sawi.
Nilaini khan chief minister chuan a pisa-ah Mizoram sorkarin Aizawl leh a chhehvela lung tlak tamna hmun zira chiang tura a sawmte nen an inkawm a. Lengpui kawng Pukpui bul ko hlauhawm siamna tur leh Ngaizel lung tla thin tihnepna leh chhiatna a thlen fo thin pumpelhna tur chu Central Institute of Mining & Fuel Research (CSIR-CMIR) te nena tangkawpin, a tul anga IIT lam mithiamte pawh rawnin, DPR tha tak siam ran tha a tih thu a sawi.
Zirchiangtute chuan Lengpui road Pukpui bul chu, a ko hi chhawrdawh (benching) tura hal tha an hriat thu leh, a chung lama ram neitute pawhin mipui himna atan an ramte hi an pek phal mai an beisei thu an sawi.
Ngaizela chhiatna a thlen hian, kawng chhak lam ko hnaiha lirthei awm leh tlan laite chungah a thleng deuh zel a. Kawng a zau thawkhat nain a thlang lam sirah city bus dah anih avangin lirthei kaltlang turten kawng chhak lam hnaiha an tlan a ngai thin a. Hei hi tihdanglam a tul nia a lan thu Chief Minister an hrilh.
Ngaizela lung tla thin venna rintlak tak, khuarei daih ni bawk si siam tur chuan Rs. 90 Crore vel zet a tul dawn nia an ngaih thu an sawi a. Hlimen lama hmalak dan tur tha nia an hriat pawh an sawi bawk.
Sorkarin mithiam a sawmte hi Er. Manthan Chauhan, Asst. Manager, Maccaferri Geo-technical Solutions Pvt. Ltd leh Dr. C. Sawmliana, Chief Scientist, Council of Scientific & Industrial Research – Central Institute of Mining & Fuel Research (CSIR-CMIR) Central Institute of Mining & Fuel Research (CSIR-CMIR) te an ni.