Aizawl: Sorkar laipui Ministry of Home Affairs hmalaknain ram chhungah Civil Defence Mock Drill neih mek zelah Mizoramah pawh mock drill neih niin, zanin hian Mizoram district pathumah Saitual, Serchhil leh Lunglei-ah te Mock Drill neih tura ruahman a ni.
Saitual district-ah chuan zan dar 6:30 atanga dar 6:33 chhung neih tura ruahman a niin, zan dar 6:25 atangin au rinna hmangin siren tihrik a ni dawh a. Hemi hun chhung hian Saitual Bawrhsap Dr Lalngura Tlau chuan current tihthim chhung hian eng thei chi reng reng engmah tih en loh tur leh inverter bakah generator hmangten tithi vek tur leh lirthei khalh laite an awm a nih pawhin engine tithi vek turin hriattirna a tichhuak.
Saitual district hian naktuk chawhma dar 1 atangin ‘Mock Drill on Building Fire caused by Air Raid’ an nei dawn bawk Hei erawh hmun thlan bik, Govt. Selchhunga P/S, Saitual bakah FCS&CA Godown-ah leh Saitual Bazar-ah neih tum a ni.
Lunglei district-ah chuan zan dar 8:30 – 8:35 inkarah Lunglei Municipal Council (LMC) huam chhung veng 24-ah kalpui tura ruahman a ni a. Zan dar 8:30-ah P&E Department ten power an titawp ang a. Veng tinah YMA information centre kal tlangin minute khat chhung ralkhel dar (siren) tihrik a ni ang a, hemi rual hian mipuiten inverter, generator leh solar hmanga eng chhit zawng zawng pawh tihthim vek tur a ni anga. Lirthei tlan laite pawh felfai taka dingin, minute nga chhung chu tihthih vek tur a ni.
May 15, 2025 chhun lama Lunglei khawpui chhung hmun thenkhata civil defence fire mock drill buatsaih tura ruahman erawh chu hun remchang dangah a tul anga la kalpui turin dah rih a ni.
Serchhip district-ah zan dar 8:30 atanga dar 8:35 chhung hian Serchhip town area-ah Blackout Mock drill neih tur a ni a. Zan dar 8:29 ah veng tina Information Centre atangin siren hi minute khat chhung tihrik tur a ni a. Hemi chhung hian eng zawng zawng tih thim tur a ni a. Solar/Inverter/power backup nei ten off vek tur a ni. Lirthei tlan lai te chu tihdin a, light leh engine te off tura tih a ni bawk.