Aizawl: Regional Institute of Paramedical and Nursing Sciences (RIPANS) a Final year M.Sc Nursing zirlaite chuan ‘Investing in Nurses, Investing in Health: Empowering the future of healthcare’ tih thupuia hmanga ni hnih awh tur ‘Continuing Nursing Education’ program khuhhawnna an nei a. He hun hi Health Minister Lalrinpuii’n khuallian niin a hmanpui.
Nimina RIPANS Conference Hall-a inkhawmah khuallian Lalrinpuii chuan, RIPANS chu India hmarchhaka nursing zirna in changtlung ber a nih thu a sawi a. Nurse te chu mipuite hriselna kawnga dinhmun pawimawh tak chelhtu an ni tih inhre reng tur leh mipuite tana rawngbawltu an nihna chu vawng nung zel turin a chah.
Health Minister chuan sorkar pawhin mipuite hriselna chu a ngai pawimawhin, Mizoram Universal Healthcare-te pawh mi tin huapzo turin a kalpui tan mek tawh tih a sawi bawk.
Training-ah hian Nursing zirna in leh damdawi in hrang hrang atangin Nursing zirtirtu, Senior Nursing Officers leh Nursing Officers 30 te an tel a. Thupui hrang hrang zirtirna nei turin mi thiam bik panga sawm an ni.