Tun hnaiah Sericulture department hnuaia hnalak turah thil dik tawk lo a awm nia hriain Mizo Zirlai Pawl (MZP) chuan a chhuichiangtu tur din an rawt rup mai a, sorkar pawhin ngaihvenin enfiah zui ngei se a tha hle.
MZP te sawi danin Sericulture demonstrator post pali lak turah exam hall-a mobile phone kenglut leh entawn an awm ni ngeiin an sawi a, exam beitu thenkhatin complain mah se he exam hi kaltlangpui a ni tho niawm tak a ni.
He thil hi a serious hle a, dan dik lo taka titute hi hremna pek ngei chi an nih bakah, sorkar hnathawk lai an nih phei chuan insawifiahtir mai pawh ni lo, hna atanga bantirna tling niin a lang.
Kan ramah hna a vang tawh em em a, thiamna sang tak takte pawhin hna an hmuh theih tawh loh laia tute emaw lo titha peih lo, dan baka kal tum an la awm fo hi chu enzui mai mai chi niin a lang lo bawk.
Sorkar hian kan zirlaite duh dan hi ngai pawimawhin, thil dik lo titute hi hremna pe ngei se la, an mualpho hma hian a tling leh fair-te ngei lak dan kawng dap ngei bawk teh se.
MZP sawi danin dan dik lova thilti an awm chung hian post pali ruak hnawhkhah erawh department lam hian an titlang zel tho a, May 8 khan appointment pawh pek fel an nih thu an sawi a, sorkar hian thalai tam takte beidawnna khua a sei loh nan kan zirlaite duh dan hi ngai pawimawhin, hma la thuai mawlh teh se.