Aizawl: Tun hnaia Zuangtuia hot mix plant tihchhiat a nih chungchang thu kal zelah PWD hotute chuan Zuangtui khawtlang hruaitute ngaihdam dilna pawmin, FIR an theh luh pawh hnukkir an remti.
Nimina PWD Engineer-in-Chief Mini Conference Room-a PWD hotute leh Zuangtui Local Council & All NGO aiawhte’n inremna zawngin an inkawm a. An inkawm hnuah joint press statement an siam.
An joint press statement-ah chuan, “Ni 07.05.2025 (Nilaini) zana PWD Complex Zuangtuia Aizawl khawpui kawng siam mekna hot mix plant chu khawtlang mipui kut tuara suasam leh tihchhiat a nih chungchangah Zuangtui Local Council leh All NGO aiawhte chuan Engineer-in-Chief, PWD-ah khawtlang aiawhin ngaihdam dilna an rawn thlen a, chutih rual chuan pawikhawihna thlen avanga FIR PWD lamin an theh luh chu hnuk let leh turin an rawn ngen bawk a. PWD official-te leh Zuangtui Local Council & All NGO aiawhte chuan uluk taka kan ngaihtuah hnuin Mizoram leh mipuite that tlanna turin inhrethiam leh inrem tlang taka awm hi tha kan ti a. PWD lamin FIR an theh luh tawh chu hnuh let leh nise kan ti a, tun hnuah hetiang hi thleng tawh lo se kan ti,” an ti.
He inremnaah hian PWD leh Zuangtui khawtlang aiawhte’n hming an ziah hnan a ni.
Hetih lai hian, Aizawl MNF East – I Block chuan, Zuangtui Local Council & All NGO ten an veng mipuite hmalaknaah, politic ball a hman an hlauh vangte leh FIR hnuhkir turin hma an lak tak avangin an ngenna angin an hmalakna chu tihtawp hrih nise an ti a, khawl sawn a nihna turin moral support erawh an pe reng tih an sawi.