Aizawl: MZP chuan nimin khan HSSLC Exam 2025-a top 3-a Mizo tlingte (Arts, Science & Commerece) chawimawina hun an buatsaih a. He hun hi Agriculture Minister PC Vanlalruata’n khuallian niin a hmanpui.
Vaivakawn Cultural Centre-a HSSLC Top 3-a Mizo tling chawimawite hi mipa leh hmeichhia pali ve ve an ni. Zirlaite hi chawimawina thuziak, pawisa fai Rs 50,000 theuh bakah lehkhabu pahnih hlan an ni.
MZP Vice President Dr. C. Lalremruata kaihhruai inkhawmah khuallian chuan, “Zirna (education) hi puitlinga min siamtu a ni a, zirna chuan kan nunkawng zawhah min hruai a, dinhmun thaa min dintir theitu chu zirna a ni,” a ti.
Khuallian chuan, vawiina an chawimawite hi an insum theihna avanga hetiang dinhmun hi thleng thei an nih thu sawiin, “Ruihhlo a ni emaw, Social media lam a ni emaw, eng kawngah pawh insum theihna kan neih a ngai a. Kan ram leh hnam kal zel tur hi tuna thalaite leh zirlaite kutah a awm a ni,” tiin ruihhlo laka fihlim tum tlat turin zirlai kalkhawmte a chah.
He hunah hian Aizawl SP Rex Zarzoliana Vanchhawng leh MZP President H Lalthianghlima te pawhin thu an sawi bawk.