Aizawl: BJP Mizoram chuan nimin chhun khan India leh Pakistan inbeihnaa ral hmatawnga awm India sipai, Mizo tlangval huaisente zahna leh an thlawpna lantirnna bakah chawimawina kawngzawh an huaihawt.
‘Citizen for National Security’ leh ‘Operation Sindoor’ puala kawngzawh chu War Memorial, Treasury Square atanga Vana pa Hall kawt thleng neih a ni a. He hunah hian BJP Mizoram party mite bakah Ex-Servicemen-te leh sipai chhungte an tel a. War Memorial leh Vana pa Hall kawtah inkhawm tawi neih a ni.
War Memorial-a inkhawm tawi hi BJP State Vice President Vanupa Zathang chuan a kaihruai a. State President Vanlalhmuaka chuan thu sawiin, India ram khawpui hrang hrangah ram venhimna hna thawktu, a bikin Mizo tlangval, ram tan mutmu pawh tuah hleithei lo leh thih huama ral do mekte’n zah an phu ang takin zahna lantirna’n leh an hnungah India ram mipui an awm a ni tih entir nan kawngzawh hi huaihawt a nih thu a sawi.
Vanlalhmuaka chuan J&K-a Pakistan thlawp firfiakte’n mipui an pawng kah vak vanga nunna chan te chu an tawrhpui tih a sawi a. Firfiakte leh firfiakte thlawptu ramte chu India ramin mit a siai khum mai lo va, nuai chimih a tum avangin Prime Minister Narendra Modi kaihhruai sorkar chuan firfiakte chu na takin chhan letna a pe tih a sawi.
BJP State Vice President K Changliana kaihhruai Vana pa Hall kawta inkhawmah BJP State Core Group member Lalrinliana Sailo, Assembly Speaker hlui chuan thu sawiin, India ram hi democracy ram anih avangin tumah tihbuai leh beih hi duh ngai lo mah se, firfiakte’n Pahalgam-a chawlh hmang mipui beiin, mi tam tak an that a. Chuvangin, India chuan hetianga firfiakte beihna chu na taka chhang letin, India chakna leh thiltihtheihna lantir nan a hmang ta a. Party dang pawhin PM Modi an thlawp thu leh a lama an tan tlat thu pawh an sawi tih a sawi.