- K. Hmingthankaia
Sawrkarin Health Care Scheme thar a siam a, inziaklut turin ration card enmil a ngai. Mi tam tak tan ration card siam that a ngai a. Health care chungchangah chauh lo pawh ration card siam that ngai kan tam em em a ni. Chutih laia ration card siamna khawl ber, server an ti emaw ni, rei tak a thi tlat tawh mai si a, he thu ka ziah lai thleng hian thla hnih a tling tep tawh. He thil hi helaia tihthih pawh ni lo, thil tih dan thlakthleng tur vanga phailam atanga tihthih a ni awm e. Mahse, a rei ta em mai a, mipui kan mangang ta a ni. Hetih chhung hian kan lo damlo ang tih a hlauhawm a, a then buhfai lak dan buaichuar takin an awm anga, a then ration card enmil ngaia tihtur neite tan a buaithlak ta em em a nih hi.
Hla tak tak atangin min bialtu DCSO Office kan pan thlawn zing ta hle mai. Ration card buaipui tawk vel mihring hi chu Office-a thawkte lah hian min lo ngai pawimawh lo angreng si a. Han zawt thui deuh dawn ila, ” Engmah kan hre bik lo, pawna saw kan tar saw” an ti hmuk zel si. An office luhna kawngka biang leh lam leh lama hrui thlungin, Ration card siamna khawl chhiat thu leh, a that hun tur an hriat loh thuziak an khai a. Luh pawh inthlahrunawm khawpin hrui an thlung po mai si a.
Ni 4.4.2025 khan min bialtu DCSO ‘W’ office ka pan a, an khawl chhiat thu min hrilh a, a kar leh lama kal leh turin min ti a. Ni 9.4.2025 chuan ka kal leh a, a lo la tha chuang lova. Kal thlawn a buaithlak thu ka sawi chuan, ” In veng hnaihlam ami DCSO ‘E’ office lo zawt hmasa la” min ti a. Tichuan, a hnuah DCSO ‘E’ office chu ka zawt ta a, a lo la tha chuang lova. ‘Lo kal buai ngai lovin tu emaw phone number min pe thei mai em? ‘ ka ti a, an pek theih loh thu min hrilh a. Keiin, ‘ A uiawm viau em ni? Pakhat mahin in phal lo a maw? ‘ tih leh talh pahin ka hawi kual a. Ka dawr deuh ber nu chuan, ” Phone number inpek hi a uiawm. I duh leh in bialtu office amite dil rawh” min ti ta a. Zak angreng tak chuan ka chhuak ta a ni.
Ni 15.4.2025 chuan DCSO ‘W’ office chu ka pan leh ta a, khawl chu a lo la tha chuang lo. Lo kal thlawn ngai lova phone number min pe thei in awm mai em? ka ti leh a. Ka biak deuh ber, ration card khawihtu deuh ber niawm tak pa chuan, ” Kan pe thei lo. I duh leh sawta thu saw va dil rawh” min lo ti leh a. Chhaklam kil bera thu hmeichhia chu ka va pan ta a. A bula lo thu pa pakhat, peon siniar niawm tak chuan, ” Canteen number pe rawh” a lo ti a. Mahse, chu nu chuan phal zan lo hmel tak hian a number chu min pe ta hram a.
Mahse, an phone number an ui em a, phone loin vawi engemaw zat chu ka kal leh tho a. Loh theih lohin vawihnih erawh inthlahrung takin ka phone hram a. A hnuah pawh ka kal tang tang tho. Tunlaiah chuti taka phone number confidential hi a lo awm tih ka lo hre ve si lova. Tin, tunlaiah heti taka mipui hnuaihnung zawkte laka inti sawrkar hnathawk viau hi an awm meuh tawh lo emaw ka lo ti ngawt bawk a ni.
Supply department changtu Minister hi mipui lam awlsamna leh thatna tura thahnem a ngaihzia leh, mipui tana a tan nasat thawm hi a rin tehlul nen hian, office lam amite chuan mipui awlsamna chu an lo ngai pawimawh leh lem si lo a nih hi, ka ti ta deuh a ni.
Chuvangin, mi tam tak mamawh ration card siam hi a theih hrih loh a nih pawhin, a la that loh thu hi department hian zau zawk leh zing zawka puanzar thin ni se, tin, tunah hian a tha tawh a nih pawhin, puanzar tho ni se, tih hi ka’n rawt a ni e.