Ukrainian President Volodymyr Zelensky-a chuan Turkey khawpui, Ankara-ah kalin President Recep Tayyip Erdogan a hmuh dawn thu leh Ninganiah Russian President Vladimir Putin-a nen Istanbul-ah hmaichhana an inbiakna tura thil a tih dawn thu a sawi.
“He inbiakna hi a thlen ngei theih kan kan tih theih apiang kan ti ang,” tiin Kyiv-a Thawhlehnia thuthar lakhawmtute a kawmnaah a sawi.
Russia hian Istanbul-ah tu nge a tirh dawn a la sawi lo va, ‘Putin-a’n tul a tih ang apiang’ tih chauh an puang a. Putin leh Zelensky-a te hi December, 2019 hnuah an la inhmu leh lo.
Ram pahnihte hmaichhan an inhmuh hnuhnung ber chu Istanbul-ah March, 2022 kha a ni tawh a. Hei hi Russia-in Ukraine a rûn tan tirh lam a ni.
Zelensky-a hian amah ngei Russian president be tura a kal tur thu a puan hmain Putin-a chuan Turkish khawpui lian berah hian ‘engmah intiamkam lawkna awm lova’ inbiak a duh thu a lo sawi tawh.
US pawhin a mi pawimawhte a tir dawn bawk.
Thawhlehnia Turkey a tlawh tur thu a puannaah hian Zelensky-a chuan Russia chu a chhanna na tak pe ngei turin a nawr a. Kremlin erawh chuan nawrna hi Moscow tan ‘engmah lo’ a nih thu sawiin chhanna mumal a la pe lo.
Russia hian kum 2022-a indo hma atanga a phut tawh, ‘indona chhuah chhan ber’ tia a sawi chu a la duh reng a ni a, hei hi Kyiv-in a duh lo thung.
Ukrainian hruaitu hian Istanbul-a Putin-a hmuh a tumnaah hian a ngaih pawimawh ber chui ni 30 chhung inkahhai puan a nih thu a sawi a, an thawhpui, US pawh telin, an pawmpui hlawm.
Gulf ram tlawha zin mek, US President Donald Trump-a chuan Istanbul-ah hian amah ngei pawh ‘eng emaw a thlen chuan’ a kal mai thei tih a sawi.
Hei erawh a thlen a rinawm chiah lo va, US palai pahnih, Steve Witkoff leh Keith Kellogg te chu Istanbul-a kal zawk tur nia sawi a ni.
Kremlin chuan Putin-a a kal dawn em an la sawi chiang lo va. “Russia chu Ningania inbiakna turin a inbuatsaih a, chu zawng chu kan la sawi thei,” tiin Kremlin thupuangtu, Dmitry Peskov chuan a sawi.
EU foreign policy chief Kaja Kallas chuan Zelensky leh Putin an inkawm tur chu thil lawmawm a nih thu a sawi bawk.