Aizawl: Aizawl Municipal Corporation (AMC) huam chhunga local council tina chairman leh Secretary te tan nimin khan training buatsaih a ni. He hunah Aizawl Bawrhsap Er Lalhriatpuia chuan furpui lo thlen huna chhiatrupna laka an huamchhung theuh a him zawk nan local council tinte inralrin renga awm turin a chah.
Nimina Aizawl DC Pisa Pui Hall-a training buatsaihah Aizawl Bawrhsap chuan, DC Pisapuiin mipui rawng a bawlna kawngah local council-te chu an kutke ber an nih avangin, thawhhona tha an neih bakah an intuaithar ve reng a tul a. Local council atang pawha rawtna tha leh an finchhuahna an mamawh ve reng avangin training buatsaih an nih thu a sawi.
Er Lalhriatpuia chuan, furpui thleng turah chhiatrupna laka an huam chhung theuh a him zawk theih nan local council tinte chu in ralring renga an awm a tul tih a sawi a. Aizawl district huamchhunga chhiatna thleng thei tihnep nan leh pumpelh nan Aizawl District Disaster Management Authority-a Chairman a nihna anga thuneihna a pek hmangin ‘Hriattirna’ chu May 13, 2025 khan a tichhuak tawh a. Hei hi mipuiin an zawm ngei theih nan an huamchhung theuh hneh taka vil turin a chah.
Inkhawmah hian income, residential, ST certificate, ILP, PM Vishawakarma leh PM Surya Ghar (Solar Rooftop) chungchangte an inzirtir a ni.
He hunah hian AMC huam chhunga local council 87-a Chairman leh Secretary te an tel a ni.