Supply department chuan kumin fur thleng tur atan buhfai an chhek khawl (moonsoon stock) a awm tawh thu an sawi a, mipuite tan thlanphanna tur a awm loh thu sawiin, thu hriat nuam tak pawh a ni.
Kan hriat angin kan hmalawkah furpui kan hmachhawn leh ngei dawn chiang a, nitin mamawh leh inhmakhua theihna kawng hrang hrang lo inhmakhua lawk hi kan tihmakmawh a ni.
Heng inbuatsaihna zawng zawng atana pawimawh hmasa bawk chu kawngpui hi a ni a, inkalpawhna kawngpui a that loh chuan engmah a tih tak tak theih loh a ni ber a, tun atangin sorkar pawhin chet la se a tha hle.
Silchar road, Mizoram chhung china kawng chhiat avangin lirthei neitute an lo nuarin, an lirthei an lo tlan lohtir fo tawh a, kuminah pawh hei hi hmachhawn leh thei reng kan ni. Tlawmngai pawl hrang hrangte pawhin lirthei tlan thei lova an siam leh pawh a hlauhawm hle.
Kan hmalawka furpui kan hmachhawn turah hian kawng engkimah inruahmanna tha nei ila, kan kawngpuite chei hnumin, khawii hmun pawh lirthei tana zawh nuam tura kan lo siam lawk a tha hle. Sum awm loh hi chhuan lam a tling foin a rinawm loh a, ram khat hruaitute tan sum hi a tul chuan hman tur a awm zel tur pawh a ni, chutiang tur chuan sorkar pawh lo inruahmanin, hma la nghal thuai thuai teh se.