Aizawl: Home Minister K Sapdanga hovin nimin khan Police, Excise, Social Welfare Department leh Central YMA-in Aizawl khawpui himna an sawi ho.
Home Minister pisa-a thutkhawmah hian tun hnaia Aizawl khawpuia ruihhlo ti thin khawlaia veivak an tam thu te, ruihhlo avanga thihna thleng leh mipui nawlpui himna an sawiho a. Tun hnaia Tawngtai Bethel Camping Centre atanga vawi leh khata tam tham tak chhuak avanga harsatna awm theite pawh sawiho a ni.
Thutkhawm kaihruai tu Home Minister K Sapdanga chuan Aizawl khawpui himna turin Police, Excise leh Central YMA thawhhona a pawimawh thu a sawi a. An thawhho that avanga lawmawm a tih thu a sawi a; Aizawl khawpui boruak thlirin theihtawpa tan rual zel a tul thu a sawi.
Excise and Narcotics Department Minister Lalnghinglova Hmar chuan sualna do kawngah sorkarin theihtawp a chhuaha bakah, Central YMA an che chhuak thin chu lawmawm a tih thu a sawi a. Ruihhlo ti thinte avanga harsatna awm sut kian kawngah pawh Central YMA nen pheikhai rual taka an kal zel thei chu lawmawm a tih thu a sawiin, tun hnaia Aizawl khawpui boruak thlirin inthlahdah loa tan rual zel a tul thu a sawi.
Thutkhawmah hian Aizawl SP Rex Zarzoliana Vanchhawng pawhin tun hnaia police-in Aizawl khawpui venhim hna chu chhun zan zawma an duty thin thu a sawi a. Excise and Narcotics Department Commissioner Z Lalhmangaiha pawhin tun laia Aizawl khawpui leh district khawpui dangah zan lama special drive neia zu leh ruihhlo an ven dan te, tun hnaia ruihhlo man kawnga an hmalakna leh hmun pawimawh bika an duty thin dante a sawi bawk.
Social Welfare department Commissioner & Secretary Lalzarmawii’n Mizorama sorkarin ruihhlo ngai enkawlna hmun a neih dan te, seat awm zat leh an enkawl mekte report a pek bakah, ruihhlo ngai tam zawkte enkawl thei tura sorkar ruahmanna neihte a sawi a. Central YMA President Lalhmachhuana pawhin khawtlang himna tura YMA hmalak mek dan te, ruihhlo do tura Central Anti Drugs Squad hnathawh dante a sawi fiah a. Central YMA hruaitu dangte pawhin khawpui himna tura hmalak mek leh rawtna an neihte an sawi ve bawk.