Union Minister for Agriculture & Farmers’ Welfare Shivraj Singh Chauhan chuan biakhmuhtheih kaltlangin Thenzawl Horticulture College Academic cum Administrative Building leh College of Veterina Sciences & Animal Husbandry, Selesih-a PG Girls Hostel thar a hawng.
Union minister hi Thenzawl Horticulture College Academic cum Administrative Building hawng tur leh a hmunhma tlawh turin Thenzawla kal tum ni mah se, Guwahati leh a chhehvelah khua a nawm loh avangin chawpchilh takin a thulh a. Online video conference hmangin chawhnu lam khan a rawn hawng ta zawk.
Chauhan chuan Mizoram chu ram nuam, ram ralmuang leh thlai chi hrang hrang chin theihna ram tha a ni a. Thlai thar chhuahna hmunpui ni thei khawpa ram tha ni mah se, tlangram a nih vangte, leilung luangral chak lutuk vang leh tlang ram lo neih bansan harsa an tih vangtein chona lian tak a hmachhawn mek a. An hmaa chona awmte hmachhawna, kuthnathawktuten hlawkna leh hmasawnna ngelnghet an neih theih nan college pahnihte hi an thuam tha zel tih a sawi.
Horticulture College Campus-a hawnna inkhawm hi Chief Minister Lalduhoma hova hawn a ni a. Chief minister chuan Central Agriculture University (CAU), Imphal hnuaia zirna in pawimawh pahnih, College of Veterinary Sciences & Animal Husbandry, Selesih leh College of Horticulture, Thenzawl te Mizoramin a kawl a, heng hmunten hma an sawn zel tih an hmu chu lawmawm a tih thu a sawi a. Heng zirna in te hi Mizoram leh India hmarchhak state-te tan mai bakah India ram pum tan pawha zirna hmun hlu a ni.
Lalduhoma chuan Mizoramah horticulture leh animal husbandry behchhana eizawng an tam a, farmer-ten hmasawnna tur an la ngah a, horticulture lama hmalak theihna ram te hi an la ngah a. Anni tanpui tur hian college pahnihte hian tihtheih tam tak an neia a hriat thu a sawi a. Farmer Outreach programme te pawh uar takin kalpui thin se a duh thu a sawi.
Inkhawmah hian Dr. Anupam Mishra, Vice Chancellor, Central Agriculture University, Imphal pawhin thusawi a sawi a. Mizoram Larsap Gen. Vijay Kumar Singh pawhin biakhmuh theih kaltlanga chhimin, thu a sawi bawk.