Aizawl: MPCC President Lal Thanzara’n ZPM sorkar hotute zingah Delhi tlanga sum purchaw tura kal ngam an awm mang lo chu vanduaithlak a tih thu a sawi.
Ningania Serchhip district Lungpho khua a tlawhnaah MPCC President hian kut hnathawktu sawhthing chingtute’n an thawhran an seng thei lo chu a lainat thu a sawi a. Enchhin sorkar hnuaiah sum leng vak a tlem em em a, Aizawl khawpuia sumdawng ten pawisa a van thu an sawi nasa hle nia sawiin, “ZPM sorkar hotute zingah Delhi tlanga sum purchaw tura kal ngam an awm mang lo chu a vanduaithlak,” a ti.
MLA inthlan hnuhnung bera BJP in ZPM candidate te sum leh paia an puih avangin ZPM sorkarah phut let an nei lian nia a hriat thu sawiin, “BJP MLA pahnihte hi Minister-a dah turin thu pawh an rawn niin sawi a awm a, chutiang anih loh chuan sum leh paia puitute ngei hian ZPM sorkar hi an hrek mek niin ka hriat,” tiin, ZPM sorkarah mipuite tan beisei san tur a awm lo niin a sawi.
MPCC President chuan Mizoram khaw hrang hrang a fankualnaah mipuiten Congress sorkar leh hun an nghahhlelh thu an sawi nasa niin a sawi a. Mizoram hmun hrang hrangah MLA pakhat chauh nei Congress party zawm thar an awm zel chu lawmawm a tih thu a sawi bawk.