Aizawl: Mizo Territorial Army Company hnihte awm lailawkna hmun tur atan Aizawl leh Lunglei ruahman.

Zirtawpni tlai khan Mizo Territorial Army dinna tura hmalakna kal mekah Mizoram sorkar hnuaia din, Coordination & Land Search Committee hmasa ber chu Chairman Lt. Col. Clement Lalhmingthanga hovin an thukhawmin, hemi kaihhnawiha hmalak hrang hrangte an sawi ho.

Thutkhawmah hian Territorial Army Company hnih-te awm lailawkna tur Aizawl leh Lungleiah hmun zawngin ruahmanna siam ni se, tih leh Territorial Army a tang turin Mizo thalaiten hlawhtling taka an tihtheih nan ruahmanna hrang hrangte lo kalpui turin Mizoram Youth Commission beisei a nih thu leh a tul anga Sainik Welfare & Resettlement nen hma lo la turin an rel.

May 13, 2025 khan Home department chuan Coordination & Land Search Committee a din a. Chairman-ah Lt. Col. Clement Lalhmingthanga, MLA leh Member Secretary-ah Secretary, Home Department a ruat a. Member dangte chu Secretaries, GAD, Land Revenue & Settlement, Planning & Programme Implementation, Finance, Public Works Departments leh Director, Sainik Welfare & Settlement te an ni.

CM-in Lungleng ram thlithlai

Chief Minister Lalduhoma chuan Territoial Army Battalion Hqrs hmun tur remchang a awm leh awm loh Lungleng ramah a enfiah.

Inrinni khan chief minister hian Lungleng ram chhunga Territorial Army Batallion Hqtrs hmun tur remchang a awm leh awm loh a enfiah bakah Bethel Ministry-in Human Development Centre din an tumna hmun a enpui nghal.

Chief minister hian Lungleng khawtlang hruaitute chu Lungleng lal Khamliana in kawtah a kawm a, khawtlang hruaitute chuan an khawtlang mamawh hrang hrangte an thlen.

Chief minister hi Social Welfare minister Lalrinpuii, Aizawl South III bialtu MLA Baryl Vanneihsangi bakah Bethel Ministry Speaker Frederick Lalrindika leh Lungleng khawtlang hruaituten an tawiawm.