Aizawl: Rural Development & Administration Department minister Prof Lalnilawma’n Vibrant Village Programme-II (VVP-II) chu Mizoram leh hmarchhak state-ten a rang lama an hman tangkai theih nan inkaihhruaina dan chhuah thuai turin sorkar laipui Ministry of Home Affairs hnuaia Border Area Development Secretary Dr Rajendra Kumar a ngen.
Zirtawpni tlai khan RD&AD Minister Prof Lalnilawma’n New Delhi-ah Dr Rajendra Kumar chu kawmin, Border Area Development Program (BADP) thlaktu tur Village Vibrant Programme-II chu Mizoram leh hmar chhak state ten a rang lama an hman tangkai theih nan guidelines chhuah vat a tul thu a hrilh a. Mizoram chhung a khaw tam tak, tuna VVP II a la tel lo khua, tel thei si te chu a tahtawla telh zel a ngen bawk.
Dr Rajendra Kumar chuan VVP II chu peih a nih veleh a sanction order pawh Ministry lam an inpeih thu sawiin, state sorkarin sum an dawn te hmang zo vat thin turin a chah a. VVP II hnuaia thingtlang khua la telh ve lohte pawh budget-te hman phawt anih hnuah ennawn theih a nih thu minister hi a lo hrilh bawk.
Minister Prof. Lalnilawma hi V. Lalengmawia, Additional Secretary leh K. Lalnuntluanga, Private Secretary to Minister ten an tawiawm a ni.