Ruihhlo kalkawng kan ni a, a siamna hmunpui leh kalkawng bera awm kan nih miau avangin kan thalaite ruihhloin a tibuai nasa in, sumdawnna atana hman phah hial pawh an tam hle.
Khawtlang leh kohhrana kan mi rin deuh deuhte pawh ruihhlo hmanga sumdawnna huangah hian an tel fur nia hriatna a lian chho hle a, demand a tam miau chuan supply tu an awm a ngai si. Inven thiam a ngai lehzual ta hle mai.
Kan thalaite ruihhloin a tihbuai nasat miau avang hian ruihhlo ngaite enkawlna hmun hrang hrang a lun thei hle a, a enkawltu tan chuan enkawl an hautakin tlin loh mai dawn dawna inhriatna pawh an ngah thin ngei ang.
Tun hnaiah pawh ruihhlo ngaite enkawlna hmun pakhat chu a rawn lar thar leh hluai mai a, an zawh chin bak an enkawlna a rei tawh thute hriat thar zel niin, an dik emaw dik lo emaw, ruihhlo tihbuaite enkawl tur chuan tlin ve fe chu a ngai dawn tih a chiang reng mai.
Sorkar hian hetiang ho enkawlna tur bik hi ngaihtuah ranah leh thapui thawha hmalakna turah ngai thar thei se la, kohhran nena tangrualin a enkawlna tur lam hi rintlak leh rin ngama an kalpui thuai hi chu a ngai a ni.
Ruihhlo hian eng chen nge min sawp dawn a, min luhchhuah dawn kan hre lo a, ngaihtuahna nasa zawk nen ke kan pen thiam chu a ngai chho tak zet tawh e.